A sta sira era bella a partita. U Catania in alta classifica? Viremu comu finiu. Vu cuntu ju.
U campu era chiu’ pessu da cioccolata. In pratica una risaia.
U Catania che avi jucaturi ca i peri su boni pi ddaveru un pocu trafichia ndo’ supecchiu. Iddi currunu fotti. Tanto è ca i fasci su di iddi.
Un tiro pi nuatri uno pi iddi e poi Mangiacasale. Cu è? A fascia destra di iddi, ca mannau ndo’ pissicologo, u dutturi do ciriveddu, a Nunzella e in gol ad Alfagene.
E a mia mi calau di traversu u caddozzu di sasizza.
Invece Scarsella u caddozzu su calau sanu sanu.
Infatti al posto di pareggiare a ittau fora.
Però u Catania ioca bonu e Calil tenta una magia.
Ma non è u mago Sivvan e si viri. Ma i puppetti su pronti, si pensa, invece Bastianoni, u putteri, fa na bella fissaria.
U palluni è cchiu’ lentu di un vavaluci, ma iddu è anchiuvatu e Mancosu fa il 2-0.
Sta vota mi iu di travessu u muccuni di vino.
Certo che pi cinari nda’ paci nun ie’ sirata.
U sicunnu tempu viri u Catania, ca voi po campu pessu, voi un pocu di stanchizza, voi un pocu di sfuttuna, ca a palla intra a riti nna’ bbia propriu.
A Casertana si viri è fotti, ma Calil e Barisick stasira su abbiati a canni di cavaddu e s’ammuccunu puppetta anzichitanza.
A pattita finiu, male po Catania, ma dopo tutti sti belli risuttati che carusi nun na putemu pigghiari.
Si luvaru a vita.
Da Santo nuddo è tutto, accumpagnu a Ianu a casa e mi o cucco.
Buonanotte da u Zu’ Turi.